阿史有日同朋友行過太子道，朋友就問點解太子道叫太子道，係咪真係有太子嚟過？啱呀，太子道真係因為有「太子」嚟過而命名，佢就係不愛江山愛美人、退位做咗溫莎公爵嘅愛德華王子。

話說喺1921年10月，當時嘅英國王儲兼威爾斯親王愛德華王子，乘搭英國軍艦「聲望號」開展佢嘅遠東之旅。1922年4月，愛德華王子喺印度前往日本途中到訪香港，落船後先坐八人大轎到達「歡迎亭」（宜家嘅和平紀念碑所在），再經遮打街、畢打街、皇后大道中同花園道去總督府，又喺夜晚到中環海旁欣賞沿岸景色。

愛德華王子離開香港前特登去咗九龍參觀，仲喺九龍城寨停留咗個幾鐘。為咗紀念佢訪港，香港政府將九龍附近一條路命名為「Edward Avenue」，中文名叫「宜華徑」。到咗1924年，宜華徑改做英皇子道，英皇子道喺1958年又再改名，成為宜家嘅太子道。

圖為愛德華坐轎遊香港，原圖嚟自香港歷史博物館。